ចំណេះដឹងទូទៅ
វិធីសាស្រ្តថែទាំភ្នែកឱ្យមានសុខភាពល្អ ជាពិសេសសម្រាប់អ្នកដែលប្រើប្រាស់កុំព្យូរទ័រច្រើនម៉ោងជារៀងរាល់ថ្ងៃ
រូបភាព
មនុស្សភាគច្រើនជាពិសេសបុគ្គលិកការិយាល័យ ត្រូវការប្រើប្រាស់កុំព្យូទ័រច្រើនម៉ោងជារៀងរាល់ថ្ងៃអាចបណ្ដាលឱ្យភ្នែកឈឺ ឬអាចរលាកភ្នែក។ វាអាចបណ្ដាលឱ្យភ្នែករបស់អ្នកមើលមិនច្បាស់ មានអារម្មណ៍ថាឈឺភ្នែក និងពិបាកក្នុងការសម្របទៅនឹងពន្លឺផ្សេងៗ។ ទាំងនេះជាវិធីថែទាំភ្នែករបស់អ្នកពីរោគសញ្ញាខាងលើដូចខាងក្រោម៖
១.ទុកពេលឱ្យភ្នែករបស់អ្នកបានសម្រាក
អ្នកគួរតែក្រោកចេញពីតុធ្វើការរបស់អ្នក ដើម្បីសម្លឹងមើលអ្វីដែលនៅឆ្ងាយពីអ្នកប្រហែលជា ១០នាទី រហូតដល់ភ្នែករបស់អ្នកអាចមើលចំណុចនៅឆ្ងាយៗបាន និងឱ្យភ្នែកអ្នកសម្រាក។
២.ធ្វើចលនាភ្នែក
ប្រសិនបើអ្នកអង្គុយមុខកុំព្យូទ័ររយៈពេលយូរ ហើយមិនមានពេលអាចដើរទៅណាបាន អ្នកអាចធ្វើចលនាភ្នែករបស់អ្នកទៅតាមទិសទ្រនិចនាឡិកា ធ្វើចលនាពីឆ្វេងទៅស្តាំ ពីលើចុះក្រោម។ ធ្វើបែបនេះ ៣ដងសម្រាប់ចលនានិមួយៗ ដើម្បីឱ្យភ្នែករបស់អ្នកសម្រាក។
៣.រក្សាសំណើមភ្នែក
មនុស្សភាគច្រើនដែលផ្ដោតអារម្មណ៍ខ្លាំងទៅលើការងារ មិនសូវបានព្រិចភ្នែកញឹកញាប់ទេ ដែលជាហេតុធ្វើឱ្យភ្នែករបស់អ្នកស្ងួត។ អ្នកអាចធ្វើឱ្យភ្នែករបស់អ្នកមានសំណើមវិញដោយការព្រិចភ្នែកឱ្យបានញឹកញាប់ ឬអាចប្រើប្រាស់ទឹកបន្ដក់ភ្នែក ដើម្បីផ្តល់សំណើមដល់ភ្នែកអ្នក។ អ្នកត្រូវចាំថារាល់ការប្រើប្រាស់ផលិតផលណាមួយ ត្រូវសូមការណែនាំពីវេជ្ជបណ្ឌិតជាមុនសិន។
៤.ដាក់កុំព្យូទ័រនៅលើតុទាប ឬប្រើកុំព្យូទ័រដែលអាចចល័តបាន
ធ្វើបែបនេះនឹងអាចឱ្យភ្នែករបស់អ្នកសម្លឹងចុះ ដែលការសម្លឹងចុះក្រោម ជាមធ្យោបាយមួយដែលធ្វើឱ្យភ្នែករបស់អ្នកត្រូវបានគ្រងដោយត្របកភ្នែក ហើយព្រិចភ្នែកបានច្រើន និងចេញទឹកភ្នែកបានច្រើន។
៥.កំណត់លើការប្រើប្រាស់ contact lenses
ប្រសិនបើអ្នកពាក់ contact lenses តែភ្នែករបស់អ្នកមិនសូវមានសំណើម អ្នកគួរតែប្រើប្រាស់វ៉ែនតាធម្មតាជំនួសវិញ។ មនុស្សដែលប្រើប្រាស់កុំព្យូទ័ររយៈពេលយូរ គួរធ្វើការត្រួតពិនិត្យភ្នែករៀងរាល់ ៦ខែម្ដង។
៦.ដកដង្ហើមឱ្យបានទៀងទាត់
នៅពេលអ្នកផ្ដោតអារម្មណ៍ខ្លាំងទៅលើអេក្រង់កុំព្យូទ័រ ធ្វើឱ្យដង្ហើមអ្នកធ្លាក់ចុះដោយមិនដឹងខ្លួន។ ដូច្នេះអ្នកត្រូវដកដង្ហើមឱ្យបានទៀងទាត់ ដើម្បីឱ្យលំហូរឈាមអ្នកបានល្អ។
៧.បរិភោគអាហារដែលមានប្រយោជន៍សម្រាប់ភ្នែក
អាហារដែលសម្បូរសារធាតុ DHA ដែលមានប្រយោជន៍សម្រាប់កែវភ្នែក និងការពារភ្នែកពីការខូចខាត ឮក្នុងនោះមានដូចជា ការ៉ុត និងបន្លែបៃតង រាប់បញ្ចូលទាំងគ្រាប់ធញ្ញាជាតិ ដែលមានសារធាតុប្រឆាំងអុកស៊ីតកម្មដែលអាចកាត់បន្ថយការខូចខាតកោសិកាភ្នែក និងធ្វើឱ្យសមត្ថភាពនៃការមើលកាន់តែប្រសើរ ។
៨.បរិភោគផ្លែឈើ និងបន្លែ
ជាពិសេសផ្លែឈើ និងបន្លែដែលសម្បូរវីតាមីន A ដែលជួយឱ្យភ្នែកអ្នកមានសុខភាពល្អ។ អាហារទាំងនោះរួមមាន ស្វាយ ប៉េងប៉ោះ ឳឡឹក ការ៉ុត ល្ពៅ ដំឡូងជ្វា គ្រាប់ធញ្ញជាតិ ត្រី និងស៊ុត៕
សម្រួលអត្ថបទដោយ៖ ស្រីពៅ
