ចំណេះដឹងទូទៅ
រូបភាព
ប្រសិនបើអ្នកពិសាកាហ្វេច្រើន អាចមានផលប៉ះពាល់ចំពោះសុខភាពរាងកាយរបស់អ្នក ដូចជាការគេងមិនលក់ បេះដូងលោតលឿនខុសប្រក្រតី ឬមានពេលខ្លះអាចញ័រដៃញ័រជើងក៏មាន ចំពោះអ្នកមានជំងឺបេះដូង និងអ្នកដែលមានសម្ពាធឈាមខ្ពស់ អាចមានបញ្ហាកាន់តែធ្ងន់ធ្ងរឡើង។ ដូច្នេះគួរសាកល្បងជ្រើសពិសាកាហ្វេឲ្យបានត្រឹមត្រូវ ដើម្បីកុំឲ្យប៉ះពាល់ដល់សុខភាពរបស់អ្នកគួរតែអនុវត្តតាមវិធីសាស្រ្តមួយចំនួនដូចខាងក្រោម៖
១.ពិសាកាហ្វេមិនដាក់ស្ករ ឬក្រែម
ប្រសិនបើអ្នកញៀនកាហ្វេខ្លាំង អាចពិសាកាហ្វេខ្មៅមិនដាក់ស្ករ ដាក់ក្រែម ឬទឹកដោះគោ ឬអ្វីផ្សេងៗ ហើយពិសាក្នុងបរិមាណតិចៗ យឺតៗ ឲ្យមានអារម្មណ៍ស្រស់ស្រាយ ព្រោះមនុស្សភាគច្រើនមិនបានពិសាកាហ្វេ អាចនឹងមានអាការស្ងាប ងងុយគេង ឬអ្នកដែលញៀនកាហ្វេអ៊ីន អាចមានអាការៈញ័រដៃ រសាប់រសល់ក្រៀមក្រំបាន។ ដូច្នេះគួរពិសាមួយថ្ងៃ ១កែវ ដោយពិសាយឺតៗ កុំបង្ខំពេក។
២.ពិសាឲ្យត្រូវពេល
គួរជ្រើសរើសពេលវេលាពិសាអំឡុងពេលមុនម៉ោង ២រសៀល។ ប្រសិនបើពិសាក្រោយម៉ោងនេះ អាចធ្វើឲ្យរាងកាយមានបញ្ហាគេងមិនលក់ គួរព្យាយាមជ្រើសកាហ្វេណាដែលមានលក្ខណៈជា Espresso ដូចជា Americano, Cappuccino ឬ Latte ជំនួសកាហ្វេធម្មតា ឬប្រភេទ 3-In-1 ព្រោះមានបរិមាណកាហ្វេអ៊ីន និងស្ករតិច។
៣.ជ្រើសកាហ្វេដែលមានគុណភាពខ្ពស់
អ្នកខ្លះមិនដឹងថា ការដាំដុះកាហ្វេត្រូវបានប្រើថ្នាំសម្លាប់សត្វល្អិតយ៉ាងច្រើនឡើយ។ ដូច្នេះគួរជ្រើសរើសកាហ្វេណាដែលមានគុណភាពខ្ពស់ ជាពិសេសប្រភេទកាហ្វេសរីរាង្គ អាចចៀសវាងបានពីសារធាតុសេសសល់ពីថ្នាំសម្លាប់សត្វល្អិត ហើយទទួលបានក្លិន និងរសជាតិឈ្ងុយជាងផងដែរ។
៤.ពិសាកាហ្វេមុនពេលហាត់ប្រាណ
ប្រសិនចង់ហាត់ប្រាណរំលាយខ្លាញ់ គួរពិសាកាហ្វេបន្តិចមុននឹងធ្វើការហាត់ប្រាណ វាអាចជួយដុតបំផ្លាញខ្លាញ់បានលឿន ហើយជួយបង្កើនអត្រាការដុតបំផ្លាញថាមពលក្នុងរាងកាយឲ្យកាន់តែលឿនផងដែរ។
៥.ជ្រើសរើសពិសាកាហ្វេ ព្រមទាំងទទួលទានអាហារល្អ
ការពិសាកាហ្វេជាមួយអាហារដែលមានប្រូតេអ៊ីន ខ្លាញ់ និងកាបូអ៊ីដ្រាត ជួយឲ្យរាងកាយបឺតស្រូបជាតិកាហ្វេអ៊ីនយឺត និងតិចតួចបំផុត។ ដូច្នេះគួរពិសាកាហ្វេព្រមជាមួយស៊ុត ១គ្រាប់ នំដុត ១ដុំ ឬស៊ាំងវិច ១ដុំ៕
សម្រួលអត្ថបទដោយ៖ ស្រីពៅ
