ឈ្មោះ៖ ព្នៅ
លក្ខណៈរុក្ខជាតិ៖ ជាឈើខ្នាតមធ្យម មានកម្ពស់ ១០-១៥ម៉ែត្រ សម្បកដើមពណ៌លឿងក្រម៉ៅ មែកមានបន្លាមួយ ឬ មួយគូៗ នៅប្រគាបស្លឹកពណ៌លឿងស្រួចខ្មៅចុង ។

-ស្លឹក៖ រួមមានកូនស្លឹក ៣ដុះឆ្លាស់ទង កូនស្លឹកនិមួយៗរាងដូចផ្លែលំពែង ស្រួចចុងស្រួចគល់ ទទឹង ២-៧ស.ម បណ្ដោយ ៤-១៣ស.ម មានក្លិនប្រហើរដូចស្លឹកក្រូច កូនស្លឹកមួយខាងចុង ធំជាងពីរសងខាង ។

-ផ្កា៖ កញ្ចុំផ្កាចេញនៅចុងមែក និងតាមប្រគាបស្លឹកជាចង្កោម ផ្កាធំៗពណ៌សលាយបៃតង នៅផ្នែកខាងក្នុង និងពណ៌បៃតងនៅផ្នែកខាងក្រៅ មានក្លិនក្រអូប ។

-ផ្លែ៖ រាងមូលដូចស៊ុត ឬ រាងមូល សម្បកក្រៅក្រាស់រឹងខ្លាំងរលោងពេលទុំពណ៌លឿង សាច់ស្អិតពណ៌លឿងទុំ មានគ្រាប់ច្រើន ដែលរុំទៅដោយជ័រស្អិតអន្ធិលថ្លាៗ ។

-សមាសធាតុគីមី៖ Conmarins ក្នុងនោះមាន Xanthotoxol និង alloimperatorin methylether, flavonoids, rutin និង marmesin. ចំណែក alkaloids មានដូចជា α fargarine (=allocryptopine), O-isopentenylhalfordinol, O-methylhalfordinol និងប្រេងក្រអូប ។

ផ្នែកប្រើប្រាស់៖ សំបកដើម ឫស ស្លឹក ផ្លែខ្ចី ផ្លែចាស់ ផ្លែទុំ។

កបនឹងជម្ងឺ៖
-សំបកដើម និងឫស៖ គ្រុនចាញ់ គ្រុនលោះ ញ័រទ្រូង។
-ផ្លែខ្ចី ឬចាស់៖ រាក រាកមួល ប្រឆាំងមេរោគផ្សិត។

-ផ្លែទុំ៖ ទល់លាមក អាហារមិនរលាយ ទល់ខ្យល់ ហើមពោះ។

-ស្លឹក៖ ទល់លាមក អាហារមិនរលាយ ទល់ខ្យល់ ហើមពោះ។(ស្ត្រីមានផ្ទៃពោះត្រូវប្រើដោយប្រុងប្រយ័ត្ន)។

កំរិតប្រើ៖ (ស្ងួត) 15g-20g ស្ងោរផឹកក្នុង១ថ្ងៃ ។

**សូមពិនិត្យ និងពិគ្រោះជាមួយគ្រូពេទ្យឱ្យបានច្បាស់លាស់ និងអស់លទ្ធភាពជាមុន។ វិធីនេះអាចប្រើសាកល្បងនៅពេលដែលអ្នកមិនមានជម្រើសផ្សេង។