ឱសថបុរាណធម្មជាតិ
រូបភាព
ឈ្មោះ៖ ចក ឬចកធំ
កបនឹងជំងឺ៖
-រុក្ខជាតិទាំងមូល៖ បញ្ចុះទឹកនោម ពិស រមាស់សើស្បែក ផ្ដាសាយ គ្រុនក្ដៅ ប្រមេះទឹកបាយ រំលាយស្លេស្ម រាក របេង។
-ដុតយកផេះ៖ ព្យាបាលស្រែង បូស។
-ស្លឹក៖ ឫសដូងបាត ហឺត បូស បញ្ចុះទឹកនោម សើស្បែក។
កំរិតប្រើ៖ រុក្ខជាតិទាំងមូល ឫសមានជាតិពុល
10g-15g ស្ងោរផឹក(ក្រៀម)។
ហាមប្រើ៖ ស្ត្រីមានផ្ទៃពោះ។
**សូមពិនិត្យ និងពិគ្រោះជាមួយគ្រូពេទ្យឱ្យបានច្បាស់លាស់ និងអស់លទ្ធភាពជាមុន។ វិធីនេះអាចប្រើសាកល្បងនៅពេលដែលអ្នកមិនមានជម្រើសផ្សេង។
សម្រួលអត្ថបទ៖ អ៊ាង សុផល្លែត
សូមរក្សាទម្រង់អត្ថបទរបស់ខ្ញុំរាល់ប្រភពដែលយកទៅចែកចាយបន្ត។
“ចក អាចក្លាយជាអាហារដ៏ចាំបាច់របស់មនុស្សនៅថ្ងៃអនាគត!”
យោងតាមអ្នកវិទ្យាសាស្ដ្រឲ្យដឹងថា ប្រភេទចកធម្មតាៗដែលតែងរសាត់ក្នុងបឹង អណ្តូង ស្រះនានា ជាទូទៅប្រជាជនក្នុងប្រទេសមួយចំនួនតែងយកវាទៅធ្វើជាចំណីសម្រាប់ចិញ្ចឹមទា (បាយទា) អាចជាការឆ្លើយតបទៅនឹងវិបត្តិស្បៀងអាហារពិភពលោកនាពេលខាងមុខជាក់ជាមិនខាន ក្រោយពីគេច្នៃវាទៅជាអាហារសម្រាប់មនុស្ស។
ចក ពណ៌បៃតងតូចៗអណ្តែតគ្របលើផ្ទៃទឹក វាមើលទៅមិនទំនងជាឆ្ងាញ់គួរឲ្យចង់ទទួលទានទេ ប៉ុន្តែពួកវាមានផ្ទុកប្រូតេអ៊ីនកម្រិតខ្ពស់នៅក្នុងសាច់ចករហូតដល់ទៅ ៤៥ ភាគរយធៀបទៅនឹងគ្រាប់សណ្តែកសៀងមាន ៣៦ភាគរយ។
នៅប្រទេសបារាំង និងអេស្ប៉ាញ គេអាចហៅចកថាជា «សណ្តែកទឹក» ដែលកាលពីសន្និសីទមួយនៅទីក្រុង ឈីកាហ្គោ អ្នកជំនាញបច្ចេកទេសម្ហូបអាហារ បានបង្ហាញពីវិធីសាស្ត្រនៃការសម្ងួត ចក ហើយនឹងកិនឲ្យទៅជាម្សៅមានប្រូតេអ៊ីនខ្ពស់ ពោរពេញដោយកាកសរសៃ។
ចកអាចប្រើជំនួសម្សៅផលិតផលម្ហូបអាហារដូចជាម្ស៉ៅក្រេម ធ្វើពីទឹកដោះគោ សណ្តែកសៀង និងបន្លែនានាដែលនាំមកនូវសុខភាពល្អ ។ នៅក្នុងម្សៅចកគេរកឃើញថាមិនមានភាពស្អិតអន្ធិល និងជាតិស្ករខ្ពស់នោះទេ។
អ្នកនិពន្ធបែបប្រឌិតផ្នែកវិទ្យាសាស្ត្រជាច្រើននាក់មកហើយ ដែលធ្លាប់បានប្រមើលមើលថា គេអាចសាងសង់អាងស្តុកទឹកដ៏ធំមួយ ដើម្បីដាក់ដាំរុក្ខជាតិខ្នាតតូចបែបនេះផលិតជាអុកស៊ីសែន និងអាហារនៅឯទីអវកាសនាពេលអនាគត។ តើវាអាចក្លាយជាការពិតដែរឬយ៉ាងណា?
ក្នុងខណៈពេលដែលពិភពលោកនឹងមានតម្រូវការអាហារបន្ថែមប្រមាណជា ៧០ ភាគរយពីលើចំនួនផ្គត់ផ្គង់របស់មនុស្សនាពេលបច្ចុប្បន្ន នៅរយៈពេល ៣០ឆ្នាំខាងមុខទៀតនេះ។
ក្រុមហ៊ុនផលិតស្បៀងអាហារបានអះអាងថា រោងចក្ររបស់ពួកគេអាចបំពេញ តម្រូវការបន្ថែមនេះបានដោយយោងតាមការច្នៃម៉្សៅចកទៅធ្វើជាអាហារ។
ក្រុមហ៊ុនផ្គត់ផ្គង់ហ៊ានអះអាងទៀតថា រុក្ខជាតិភូតគ្រាមនេះអាចធ្វើការដាំដុះ និងប្រមូលផលពីអាងទឹកដោយមិនត្រូវការដីធ្វើកសិកម្មឡើយ។ វាអាចដុះលូតលាស់បានស្ទើរតែគ្រប់ទីកន្លែងដែលមានការផ្គត់ផ្គង់ទឹកគ្រប់គ្រាន់។
វាជាប្រភេទរុក្ខជាតិធម្មតាៗងាយដុះលូតលាស់ពាសពេញពិភពលោក ប៉ុន្តែអាចលូតលាស់ល្អបំផុតនៅក្នុងតំបន់អេក្វាទ័រ។ រឿងដែលមិនគួរឱ្យជឿនោះគឺចកអាចលូតលាស់បង្កើតជាកូន ចក បានយ៉ាងលឿនបំផុតក្នុងរយៈពេលតែ ២៤ ម៉ោងប៉ុណ្ណោះ។
ចកលូតលាស់មានទំហំធំទ្វេរដងនៃរូបរាងនៅអំឡុងពេលពី ១៦ ទៅ ៣២ ម៉ោង និងអាចប្រមូលផលជារៀងរាល់ថ្ងៃនៅក្នុងទឹកដែលមានចរន្តហូរបំលាស់ ជាជាងទឹកដែលនៅនឹងថ្កល់ស្ងៀម។ ការរីកលូតលាស់របស់ចក បានជួយការពារការហួតរីងពីកំដៅថ្ងៃ។
បើទោះបីជាចកដុះលើទឹក តែការស្រូបយកទឹកតិចជាងដំណាំកសិកម្មដែលដាំលើដី ត្រូវការស្រោចទឹកដទៃទៀត។
លោកស្រី Cecilia Wittbjers នាយកទីផ្សារក្រុមហ៊ុន PARABEL ជាក្រុមហ៊ុនផលិត ផលិតផលអាហារបានមានប្រសាសន៍ថា ការរកឃើញវិធីច្នៃម្ស៉ៅចកទើបតែកើតមាននៅក្នុងឆ្នាំ ២០១១ នេះទេ ។
លោកស្រីបន្តថា «ចក ជារុក្ខជាតិដែលមានរសជាតិ និងក្លិនដូចជា ស្មៅស្រស់ៗនេះ ត្រូវបានប្រើជាអាហារនៅប្រទេសខ្លះនៅតំបន់អាស៊ី យូរមកហើយ និងត្រូវគេទទួលស្គាល់ថាជាចំណីសត្វនៅទ្វីបអឺរ៉ុបច្រើនឆ្នាំហើយដែរ។ ហេតុអ្វីពួកយើងមិនដឹងថា វាអាចប្រើច្នៃជាអាហារសម្រាប់មនុស្សតាំងពីយូរមកនោះ »។
ក្រុមហ៊ុននេះបានសាងសង់រោចក្រផលិតចកនៅប្រទេស អ៊ុយហ្កាន់ដា ដែលអាចនឹងផលិតចកបានប្រមាណជា ២០០០តោន នៅឆ្នាំដំបូងរបស់ខ្លួន។
លោក Duncan Cameron សាស្ត្រាចារ្យ រុក្ខជាតិ និង ដីជីវសាស្ត្រ មកពីសាកលវិទ្យាល័យ SHEFFIELD ដែលមិនពាក់ព័ន្ធនឹងផលិតកម្មចក បានបង្ហាញពីក្តីបារម្ភថា តើការផលិតចក ត្រូវការទឹកចំនួនប៉ុន្មាន? ហើយថា តើមានសារធាតុចិញ្ចឹមនានាដែលអាចទ្រទ្រង់ចកឲ្យដុះលូតលាស់ធំធាត់ទៅបានដូចក្នុងទឹកធម្មជាតិដែរឬទេ?
លោកបានបន្ថែមថា ៖ « ខ្ញុំមិនធ្លាប់គិតថា ចកនឹងក្លាយជាចំណែកមួយនៃអាហារសម្រាប់ខ្ញុំទេ។ ប៉ុន្តែប្រភពអាហារដែលមានប្រូតេអ៊ីនខ្ពស់ និងមាននិរន្តរភាពសំខាន់ចំពោះសន្ដិសុខស្បៀងអាហារពិភពលោក ពិតជាតម្រូវការដ៏ចាំបាច់មែន»។
ប្រភព៖ អត្ថបទភ្នំពេញប៉ុស្តិ៍
