កសិកម្ម
រូបភាព
ដំណាំស្ពៃខៀវ យើងអាចដាំបានស្ទើរគ្រប់រដូវ តែរដូវដែលល្អបំផុតក្នុងការដាំដុះ គឺនៅរដូវរំហើយ ពីខែតុលា វិច្ឆិកា និងធ្នូ។កសិករភាគច្រើននិយមដាំដុះស្រួលដាំស្រួលថែ ហើយនិយមហូបព្រោះឆ្ងាញ់ និងសំបូរជីវជាតិអា។
ការរៀបចំដាំដុះ៖
-ជ្រើសរើសពូជដែលមានសុខភាពល្អ ពុំមានជំងឺ គ្រាប់ថ្លោសល្អមិនស្វិត មិនមានសត្វល្អិត បំផ្លាញ រយៈពេលលូតលាស់ខ្លីស្របនឹងតំបន់ដាំដុះ
-ភ្ជួរឬកាប់២-៣ដង ជម្រៅ ២-២,៥តឹក សំណើមល្មម ហាលដី ៧-១០ថ្ងៃរដូវប្រាំង និង១០-១៣ថ្ងៃ រដូវវស្សាមុន
ធ្វើការដាំដុះ ឬអាចឆាប់ជាងនេះ ក្នុងករណីសំបូរពន្លឺថ្ងៃ។ទទឹងរង១ ម៉ែត្រ បណ្ដោយ៨-១០ម៉ែត្រ ឬតាមលទ្ធភាពដីដែលមាន។រដូវប្រាំង គេច្រើនធ្វើរងស្មើដី ឬទាបជាងនៅរដូវវស្សាកម្ពស់ ២-២,៥តឹក ចន្លោះពីរងមួយទៅរងមួយពី២,៥ ទៅ ៣តឹក។
ការសាបកូន៖-មុនពេលសាប ត្រូវរៀបចំថ្នាល ជ្រុំជ្រួយដី រាស់កៀឲ្យស្មើលើរងលាយលាយមសត្វម៉ដ្ឋ ឬជីកំប៉ុស្ត ៤-៥បង្គីក្នុងដី១០ម៉ែត្រការ៉េ ស្រោចទឹកនៅលើថ្នាល (អាចសាបលើឡាំង ឬកេសឈើ ក៏បាន) មុនពេលសាបគ្រាប់ ត្រូវសាបស្ដើងៗហើយកាត់ចំបើងខ្លីៗ គ្របពីលើរង រួចស្រោចទឹកម្ដងទៀត
-ស្រោចទឹកឲ្យបាន ២-៣ដងក្នុងមួយថ្ងៃ ពេលគ្រាប់មិនទាន់ដុះ។
ការដាំដុះ៖
-កូនអាចដាំនៅពេលមានអាយុ១០-១៥ថ្ងៃ មុនដកត្រូវបន្ថយការស្រោចទឹក២-៣ថ្ងៃ ធ្វើឲ្យដើម រឹងងាយស្ទុះក្រោយពីដាំ
-ត្រូវស្រោចទឹកកូនស្ពៃមុនដកទៅដាំ ស្រោចទឹកថ្នាលបម្រុងដាំឲ្យសើមជោគល្អ ដកកូនដើមធំល្អ
-ដាំដាក់ឫសឲ្យត្រង់ចុះក្រោម កុំឲ្យលិចបណ្ដូល ចន្លោះជួរពី២-២,៥ តឹក និងចន្លោះគុម្ព ២តឹក ដាំហើយត្រូវកាត់ចំបើងខ្លីៗគ្របតាមគុម្ពដែលដាំរួច។ត្រូវស្រោចទឹកមួយថ្ងៃ ៣ដង ករណីគ្មានអ្វីគ្រប ។ ស្រោចទឹកឲ្យជោគ ក្រោយពេលដាំរួច គ្រប់កូនពី២-៣ថ្ងៃ ដើម្បីការពារកម្ដៅថ្ងៃខ្លាំង ។
ការថែទាំ៖
-ស្រោចទឹក ៣-៤ដង នៅរដូវប្រាំង ក្រោយពីដាំ ៣-៤ថ្ងៃ
-នៅរដូវវស្សា ស្រោចទឹកព្រឹកល្ងាច ប្រសិនបើមានភ្លៀង ត្រូវស្រោចទឹកលាង
-ប្រើជីលាមកសត្វម៉ដ្ឋ ឬជីកំប៉ុស្ត ៥គីឡូក្រាម លើផ្ទៃដីមួយម៉ែត្របួនជ្រុង រយៈពេល៧ថ្ងៃ បន្ទាប់ពីដាំ
-ស្រោចជីអ៊ុយរ៉េមួយស្លាបព្រាបាយ លាយជាមួយទឹកមួយប៉ោត លើផ្ទៃដីមួយម៉ែត្របួនជ្រុង រៀងរាល់៣ថ្ងៃម្ដង បន្ទាប់មកស្រោចទឹកធម្មតាលាងជាក្រោយ ។
ការប្រមូលផល៖
-សាបផ្ទាល់ អាចប្រមូលផលពី ៣០-៣៣ថ្ងៃ
-សាបដកកូនយកមកស្ទូង ឬដាំ ប្រមូលផលពី ៣៦-៤០ថ្ងៃ វាអាស្រ័យទៅនឹងការថែទាំ៕
ប្រភព: អ៊ាង សុផល្លែត
