កសិកម្ម
រូបភាព
I.ការជ្រើសរើសពូជ:
១.ការជ្រើសរើសពូជគោ:ជាទូទៅកសិកររបស់យើងចិញ្ចឹមគោគឺ ដើម្បីទុកភ្ជួររាស់និងអូសទាញដូច្នេះការជ្រើសរើសគឺត្រូវផ្អែកលើសមត្ថភាពភ្ជួររាស់ អូសទាញនេះឯង។
+អំពីរូបរាង:
-គោឈ្មោល:មាឌធំមានលំនឹងខ្ពស់មុខទាបក្រោយរហ័សរហួនស្លូត។
-គោញី:មាឌល្មម រហ័សរហួន ស្លូត។
២.របៀបបង្កាត់ពូជ:ត្រូវជ្រើសរើសរកបាល្អ ដែលនៅក្នុងភូមិឬក្នុងឃុំយើងមានកាលណាមេគោរកឈ្មោលយើងយកបាណាដែលយើងពេញចិត្ត ដែលក្នុងតំបន់ជិតនោះមាន ឬក៏ប្រើវិធីបង្កាត់ដោយសិប្បនិមិត្ត ជ្រើសយក ទឹកកាមបាដែលយើងស្រឡាញ់ចូលចិត្តមកបង្កាត់នោះនឹងបានកូនល្អតាមការចង់បាន។
II.ការផ្តល់ចំណីអាហារនិងការថែរទាំ:
+ចិញ្ចឹមគោឈ្មោល :
-ការផ្តល់ចំណី:រដូវរកញីឈ្មោលត្រូវបង្កើនចំណីពី១០-២០% ក្នុង ១ថ្ងៃប្រៀបនឹងរបបធម្មតា ។
-អោយស៊ីបន្ថែមកន្ទក់ពន្លកស្រូវអំបិល(៣គក្រចំបើង+០.៥ គក្រពន្លក ស្រូវ+១.៥០គក្រកន្ទក់ម៉ត់+៦០ក្រាមអំបិលក្នុងគោ ១ ក្បាល)។
+ការថែរទាំ :-ខែក្តៅត្រូវឧស្សាហ៍មុជទឹក និងលែងឲ្យវាដើររកស៊ីដោយសេរី
-ខែភ្លៀងបន្ថយពេលវេលាលែងឲ្យវាដើររកស៊ី
-ត្រូវពិនិត្យមើលក្រចកជើងវារាល់ថ្ងៃក្នុង១ឆ្នាំត្រូវចិតក្រចក២-៣ ដង
-ចាប់ពីអាយុ៨-១០ខែត្រូវខ្លុះច្រមុះដើម្បីងាយស្រួលដឹកវា។
ចំពោះគោឈ្មោអាចឲ្យពាក់ញីក្នុងអាយុ១៨–២៤ ខែ។ប្រើប្រាស់មានប្រសិទ្ធិភាពល្អគឺក្នុង ចន្លោះពី២-៦ឆ្នាំ។
+ចិញ្ចឹមគោញី:
-ចំពោះគោញីចាប់ផ្តើមរកឈ្មោលលើកដំបូងអាយុ ១៨-២៤ ខែ
-រដូវ:២១ថ្ងៃ
-រយៈពេលផើម:២៨០-២៨៥ថ្ងៃ
+ការផ្តល់ចំណី:ត្រូវថែទាំមេគោផើមឲ្យបានហ្មត់ចត់ មិនត្រូវឲ្យវាធ្វើការហួសកម្លាំងទេ។ពេលកើតកូនត្រូវឲ្យស៊ីស្មៅខ្ចី បន្ថែមកន្ទក់ម្សៅត្រីអំបិល(៥០ក្រាមក្នុងគោ ១ក្បាល ក្នុងមួយថ្ងៃ ) ។
+ការថែទាំ:-មុនពេលកើត:ឲ្យមេគោសំរាកពីការងារ១-២ខែមុនពេលកើត
-អោយស៊ីស្មៅខ្ចី
-ក្រោលត្រូវស្អាតបាត ស្ងៀមស្ងាត់
+ពេលកើត:ជាទូទៅការបង្កើតកូនរបស់មេគោមិនសូវមានបញ្ហាទេលើកលែងតែក្នុងករណីដែលមេពិបាក កើតដោយសារកូនភ្លោះឬក៏កូនក្នុងពោះឋិតក្នុងសភាពមិនធម្មតា។ពេលកើតភ្លាមត្រូវយកចំបើងជូតទឹករំអិលឲ្យកូនគោឲ្យបានស្អាត រួចហើយទុកឲ្យមេវាលិឍ។ឲ្យមេគោផឹកទឹកអំបិលឬក៏ទឹកតែលាយស្រា(ទឹកតែ១លីត្រ+ស្រា១០សា្លបព្រាបាយ)តាមធម្មតាសុកធ្លាក់អស់ក្នុងចន្លោះពេលពី៤-៦ ម៉ោង។
+ក្រោយពេលកើត: យកទឹកក្តៅអ៊ុនៗលាយអំបិលលាងទឹកសំអាតដោះយោនីនិងម្តុំគូទខាងក្រោយ។
-កើតបាន ១ ម៉ោងត្រូវឲ្យកូនគោបៅដោះ
-ឲ្យមេគោស៊ីស្មៅខ្ចី ស៊ីបបរ ឬក៏ចំណីណាដែលស្រួលរំលាយ
-ឲ្យមេគោសំរាក ១ខែ ក្រោយពេលបង្កើតកូន រួចហើយឲ្យធ្វើការស្រាលៗជាបណ្តើរៗ។
៣.ការចិញ្ចឹមកូនគោ:-ឲ្យកូនគោបៅទឹកដោះដំបូងភ្លាម ក្រោយពេលវាអាចងើបឈរបាន។
-ក្នុង១០ថ្ងៃដំបូងត្រូវឲ្យកូនគោបៅឲ្យបានឆ្អែតគ្រប់គ្រាន់
-មិនត្រូវលែងកូនគោ ឲ្យដើរតាមមេវាទេ
-ចាប់ពីអាយុ១ខែត្រូវបង្កាត់កូនគោឲ្យចេះស៊ីស្មៅខ្ចី
-អាចផ្តាច់ដោះកូន គោក្នុងអាយុ៥-៦ខែ
៤.ចិញ្ចឹមគោភ្ជួររាស់អូសទាញ:
ក-ការផ្តល់ចំណី:បើឲ្យគោធ្វើការពេញ១ថ្ងៃត្រូវឲ្យវាស៊ី៣ពេលព្រឹកថ្ងៃត្រង់ និងយប់។ត្រឡប់មកពីធ្វើការ មិនត្រូវឲ្យស៊ីភ្លាមទេត្រូវឲ្យវាសំរាក លាងទឹកសំអាតខ្លួនប្រាណឲ្យវា រួចហើយ ៣០ នាទីក្រោយឲ្យផឹកទឹក លាយអំបិល (១០ក្រាមក្នុងទំងន់ ១០០ គក្រ) រួចហើយសឹមឲ្យស៊ី ។ ខែក្តៅ ធ្វើការ ហើយមិនត្រូវឲ្យគោផឹកទឹកភ្លាមទេ ត្រូវឲ្យវាសំរាក ១៥-២០ នាទី សិនសឹមឲ្យវាផឹកទឹក ។ ត្រូវឲ្យគោផឹក ទឹកស្អាត ២០-៣០លីត្រ។
ខ-ការថែទាំ :-ក្រោយពេលភ្ជួររាស់រួចត្រូវច្របាច់ស្មាឲ្យវា
-លាងទឹកឲ្យវារាល់ថ្ងៃ ក្រោយសំរាកពីការងារ ៣០ នាទី
-បើភ្ជួរពេញមួយព្រឹក ត្រូវឲ្យសំរាកពីរដងម្តងពី ២០-៣០ នាទី
-បើភ្ជួររាស់ជាប់គ្នា៥-៦ថ្ងៃ គួរឲ្យសំរាក១ថ្ងៃ
-ក្នុងរដូវភ្ជួររាស់ខ្លាំង បើឃើញសុខភាពវាទ្រុឌទ្រោមត្រូវឲ្យសំរាក ៣-៤ថ្ងៃ បំប៉នស្មៅខ្ចី កន្ទក់ បបរ ។ ល។
៥.ចិញ្ចឹមគោសាច់:
ចែកជា៣តំណាក់កាល :
ក-តំណាក់កាលបៅដោះ:គឺចាប់ពីពេលកើតរហូតដល់អាយុ៦ខែ
-ក្រោយពេលកើត គប្បីជូតសំអាតកូនឲ្យស្អាត រួចហើយឲ្យបៅទឹកដោះដំបូង
-អាយុ២ខែឲ្យស៊ីស្មៅខ្ចី-អាយុ៤ខែឲ្យស៊ីកន្ទក់ចុងអង្ករកាកសណ្តែកម្សៅត្រី
ខ-ពីអាយុ៧-២១ខែ:អោយស៊ីបន្ថែមជាតិអុយរ៉េ(តែមិនឲ្យលើសពី ២៥ក្រាមក្នុងទំងន់សត្វ១០០គក្រក្នុង១ថ្ងៃ) ហើយត្រូវចែកជាពីរពេល។ដើម្បីកុំឲ្យពិបាកត្រូវគ្រៀវកូនគោក្នុងអាយុ១ឆ្នាំ។
គ/ ពីអាយុ ២២-២៤ ខែ:-រដូវក្តៅ លែងឲ្យស៊ីសេរីលើវាលស្មៅ យប់ឲ្យស៊ីបន្ថែមស្មៅខ្ចី ចំបើង ស្មៅស្ងួត ។
-រដូវភ្លៀង មិនត្រូវឲ្យគោនៅកណា្តលភ្លៀងយូរពេកទេ ត្រូវមានស្មៅ ចំបើង បង្ការទុកឲ្យគោ ស៊ី ។ ឲ្យស៊ីបន្ថែម កន្ទក់ កាកសណ្តែក ម្សៅត្រី ។
សម្រួលអត្ថបទ៖ អ៊ាង សុផល្លែត
សូមរក្សាទម្រង់អត្ថបទរបស់ខ្ញុំរាល់ប្រភពដែលយកទៅចែកចាយបន្ត។
