ព័ត៌មានកសិកម្ម
រូបភាព
ម្រុំជារុក្ខជាតិងាយដាំតាមវិធីផ្សាំ ឬតាមវិធីបណ្តុះគ្រាប់បន្តពូជ មានឈ្មោះល្បីសម្រាប់ផលិតជាឱសថព្យាបាលជំងឺផ្សេងៗ និងជាបន្លែដ៏មានឱជារសឆ្ងាញ់ផងដែរ។
វិធីក្នុងការដាំដុះដើមម្រុំ៖
១.ដាំតាមវិធីផ្សាំ
ដាំម្រុំតាមវិធីផ្សាំឲ្យផលឆាប់រហ័ស ហើយងាយថែណាស់ ដោយគ្រាន់តែកាត់មែកប៉ុនកដៃ កាត់ប្រវែងប្រហែល កន្លះម៉ែត្រ ដោតទៅដី គ្របស្លឹកឲ្យមានម្លប់ ហើយស្រោចទឹកមិនយូរថ្ងៃទេ ម្រុំនឹងដុះជាកូនរុក្ខជាតិឲ្យស្លឹកភ្លាមៗមិនយូរអាទិត្យឡើយ។ បើដោតដាំ នៅលើដីល្បាប់ នោះម្រុំរិតតែហុចផលល្អខ្លាំងឡើង។
២.ដាំតាមវិធីបណ្តុះគ្រាប់បន្តពូជ
បើដាំដោយការបណ្ដុះគ្រាប់ដាំ គឺដើមម្រុំ មានអាយុវែងឲ្យផលបានយូរឆ្នាំ ដូចជាដំណាំមៀន ដំណាំស្វាយដែរ។ ពេលបណ្ដុះគ្រាប់ម្រុំ គេត្រូវរើសយកគ្រាប់ណាដែលច្របាច់ទៅរឹងណែនល្អយកទៅបណ្ដុះ ទើបអាចដុះជាកូនដំណាំល្អ គឺគេយកគ្រាប់ម្រុំនោះ ដាក់រុំស្បៃជ្រលក់ទឹកឲ្យគ្រាប់វាសើមរីកនៅក្នុងស្បៃ ២ ទៅ ៣យប់សិន។ នៅពេលគ្រាប់នោះបែកសំបកមាត់ចាប ទើបយកវាទៅកប់បន្ថើរៗ នៅក្នុងកន្ទោងស្លឹកចេក។ គេកេវកន្ទោង ហើយដាក់ដីល្បប់ ឬដីជីរធម្មតា ហើយយកគ្រាប់ ២-៣គ្រាប់ ដែលបែកមាត់ចាប ទៅកប់ក្នុងកន្ទោងនោះ បន្ទាប់មកគេយកកន្ទោងទៅតម្រៀបគ្នា ហើយធ្វើរបងព័ទ្ធកុំឲ្យមាន់កកាយចឹកគ្រាប់នោះយកឆី ហើយយកថ្នាំបាញ់រះៗ បន្តិចៗការពារកុំឲ្យស្រមោចចូលរំលីង បណ្តូលពន្លករាងដូចចង្កូមឆ្កែ ដែលទើបដុះចេញមកសៗ ដូចសណ្ដែកបណ្ដុះ។
កាលណាបណ្តូលពន្លកនេះរំលើងទៅ ដើមម្រុំលែងដុះហើយ។ បើដាំនៅខែក្ដៅ គេត្រូវស្រោចទឹកពីលើកន្ទោងឲ្យជោគល្អ ហើយយកចំបើង ឬស្លឹកចេកទុំងាប់ៗ ទៅគ្របពីលើកន្ទោងបន្ថយកំដៅកុំឲ្យចំហាយក្ដៅខ្លាំងទៅលើកន្ទោង អាចនាំឲ្យស្វិតបណ្ដូលគ្រាប់ពូជ ដែលទើបចេញពន្លក ដែលនៅខ្ចីនោះឲ្យងាប់វិញបាន។ បើនៅខែភ្លៀងវិញ គេគ្រាន់តែការពារគ្រាប់បណ្ដុះទើបចេញពន្លកនោះ កុំឲ្យសត្វស្រមោច ឬកណ្ដុរជាដើម វាស៊ីបណ្ដូលតែប៉ុណ្ណោះ។ ក្រោយពីកូនឈើដុះធំបន្តិចហើយ ទើបគេយកដំណាំនោះទៅដាំនៅលើដី ដើម្បីឲ្យកូនដំណាំអាចដុះលូតលាស់ធំធាត់យ៉ាងសេរី៕
សម្រួលអត្ថបទដោយ៖ អ៊ាង សុផល្លែត