ព័ត៌មាន និងចំណេះដឹងថ្មីៗដែលពាក់ព័ន្ធនឹងវិស័យបរិស្ថាន កសិកម្ម ឱសថបូរាណខ្មែរ និងសុខភាព។ Useful news related to Khmer Literature, Environment, Agriculture, and Natural Medicine
វិជ្ជាមេផ្ទះ

វិធីធ្វើស្ងោរចាប់ឆាយ

11-Jun-2019 10:16 AM

រូបភាព


ដោយ: Uddam

គ្រឿងផ្សំ៖ សាច់មាន់ ឬឆ្អឹងជំនី ៥០០ក្រាម កាប់ជាដុំៗល្មម, ស្បែកជ្រូក ២០០ក្រាម កាត់ជាដុំ, ត្រចៀកកណ្តុរ ១៥០ក្រាម កាត់ជាដុំ, ពពុះសណ្តែក ១៥០ក្រាម កាត់រាងវែងបន្តិច, ស្ពៃក្តោប ៣០០ក្រាម កាត់ជាដុំ, ការ៉ុត ១មើម ចិតជាដុំ, អំបិល ១ស្លាបព្រាកាហ្វេ, ស្ករស កន្លះស្លាបព្រាបាយ, ខ្ទឹមសចិញ្រ្ចាំ ៤កំពឹស, ទឹកត្រី ២-៣ស្លាបព្រាបាយ, ហ៊ាប៊ីយាហ៊ឺ ១៥០ក្រាម ត្រាំទឹក, អាច​បន្ថែមបន្លែដូចជា ឆៃថាវ ខាត់ណា…តាមចំណូលចិត្ត, ប្រេងឆា ៣-៥ស្លាបព្រាបាយ, ទឹកធម្មតា ឬទឹកស្ងោរមាន់(បើមានយក​មក​ស្លរកាន់តែឆ្ងាញ់), ស្លឹកខ្ទឹមហាន់។

វិធីធ្វើ៖

១.យកស្បែកជ្រូក ត្រចៀកកណ្តុរ ពពុះសណ្តែក ស្រុះ ឬត្រាំឲ្យរីក រួចស្រង់ទុកមួយឡែក

២.ដាក់​ប្រេងឆា​ចូល​​ឆ្នាំង​ទុក​ឲ្យ​ក្តៅ ​​ ដាក់​ខ្ទឹម​​ចិញ្រ្ចាំចូល​រំលីង​​ឲ្យ​​ឈ្ងុយ​​ រួច​ដាក់​សាច់​ចូល​​រំលីងជា​មួយ​ខ្ទឹម​ឲ្យ​សាច់​រាង​ឆ្អិន​បន្តិច​សិន

៣.បន្ទាប់មក​ដាក់​គ្រឿង​ចូល​​ ទឹកត្រី ស្ករស និងអំបិល ច្របល់ចូលគ្នា​​ឲ្យ​សព្វ (បើគោកដាក់ទឹក ឬទឹកស្ងោរមាន់ចូលបន្តិច) ចាំដាក់​ ហ៊ាប៊ីយាហ៊ឺ ស្បែកជ្រូក ត្រចៀក​កណ្តុរ ពពុះសណ្តែកចូលច្របល់ចូលគ្នាទាំងអស់ ​​ហើយ​ចាក់​ទឹក ឬទឹក​ស្ងោរមាន់​ចូល ទុករម្ងាស់ឲ្យពុះ

៤.ពេលពុះហើយ​​ ដាក់​ការ៉ុត​ ស្ពៃ​ក្តោប​ និងបន្លែទាំងអស់ចូល​ កូរ​វា​បន្តិច​ទៀត​ ដាក់ទឹក​ចូល​យក​ស្រេច គ្របទុក​រហូត​ទាល់​តែ​
បន្លែ​ឆ្អិន​ល្មម​តាម​ដែល​ចង់​បាន ពេលហូបដួសដាក់ចានរោយស្លឹកខ្ទឹមពីលើ​ជាការ​ស្រេច៕

សម្រួលអត្ថបទដោយ៖ ស្រីពៅ