បច្ចេកទេសក្នុងការដាំដុះដំណាំល្ពៅ ឱ្យទទួលបានទិន្នផលខ្ពស់

202

បច្ចេកទេសក្នុងការដាំដុះដំណាំល្ពៅ ឱ្យបានត្រឹមត្រូវ និងទទួលបានទិន្នផលខ្ពស់។

I.ការជ្រើសរើសពូជ

នៅក្នុងវិស័យដាំដុះពូជជាកត្តាសំខាន់ជាងគេ ដូចនេះការជ្រើសរើសពូជត្រូវគោរពទៅតាមលក្ខណៈ សំខាន់ៗដូចខាងក្រោមនេះ៖

ក.អំពីប្រភេទពូជ

ពូជល្ពៅដែលប្រជាកសិករកំពុងធ្វើការដំាដុះមាន ៣យ៉ាងគឺ៖
១.ល្ពៅក្អែក៖ សំបកមានពណ៌ខ្មៅ ផ្លែមូលទ្រមៀចតូច សាច់ពណ៌លឿងចាស់ហើយក្រាស់ គ្រាប់តូចៗ ​មូល​ៗ​សាច់ល្អិត ពូជនេះផ្លែច្រើនក្នុងមួយដើមៗ វាមានទងផ្លែតូចខ្លី ស្លឹកតូចល្អិត ហើយមានរោមច្រើន គេឲ្យ​ឈ្មោះ​ថាល្ពៅភ្នំ។ ប្រភេទពូជនេះធន់ទ្រាំគេអាចដាំនៅរដូវភ្លៀងបាន ព្រោះវាធន់ទ្រាំទៅនឹងអាកាសធាតុក្តៅ ហើយ​មាន​អាយុកាលលូតលាស់ខ្លី។

២.ល្ពៅព្នង៖ សំបកពណ៌ប្រផេះធម្មតា ផ្លែតូចទ្រមៀចទងធំៗ កទងធំៗ កទងវែង ដើមតូចល្អិត ថ្នាំងរង្វើល ស្លឹក​តូច​មូលរោមស្តើងហើយទន់ ស្លឹកបៃតងខ្ចី សាច់ហាប់ណែនពណ៌លឿង ប៉ុន្តែផ្អែម គ្រាប់តូចសំប៉ែតសាច់​មាន​សរសៃបន្តិច។ ពូជនេះភាគច្រើនដាំនៅតំបន់ខ្ពងរាប និងវាលរាប ហើយនៅរដូវវស្សាវាធន់ទ្រាំ​ទៅនឹងអាកាស​ធាតុក្តៅគេហៅថា ល្ពៅល្អិត ឬល្ពៅព្នង។

៣.ល្ពៅទ្រូង ឬល្ពៅហាប៖ ពូជនេះមានស្លឹកធំ ដើមធំថ្លោស ទងស្លឹកវែងៗ ស្លឹកធំមូលត្រវែង ហើយស្តើងពណ៌​បៃតងខ្ចី ផ្លែរង្វើលធំសាច់ស្តើង សំបក​ពណ៌​ប្រផេះខ្លះមូលទ្រវែង ស្រួចក្បាល ស្រួចកន្ទុយ សាច់ពណ៌លឿងភាវ ហើយមានសរសៃច្រើន មិនហាប់ មិនស្អិត ហើយមានជាតិផ្អែមទាប គ្រាប់​របស់វាធំសំប៉ែតវែង។​​ ពូជប្រភេទ​នេះ​​គេ​ច្រើនតែដាំនៅតាមតំបន់វាលទំនាប និងរដូវទឹកសំរក ព្រោះវាមិនធន់ទ្រាំនឹងអាកាសធាតុក្តៅ។

ខ.លក្ខខណ្ខនៃការជ្រើសរើស
ការជ្រើសរើសពូជ សម្រាប់ការដាំដុះត្រូវគិតពីលក្ខណៈសំខាន់ៗដូចខាងក្រោម៖
-ពូជបង្កាត់ពូជ Hybrid F1 ជាពូជដែលផ្តល់ទិន្នផលខ្ពស់
-ពូជបង្កាត់សេរី OPV ឬពូជប្រពៃណីអាចទុកបន្តពូជទៅជំនាន់ក្រោយទៀត ប៉ុន្តែកំរិតទិន្នផលទាបជាងពូជបង្កាត់។ ជាពិសេសគឺ​ពូជ​ដែល​ផ្តល់ទិន្នផល​ខ្ពស់ សមស្របតាមតំបន់ ធន់ទ្រាំនឹងជំងឺសត្វល្អិតបំផ្លាញ ពេញនិយមនៃការប្រើប្រាស់ រីឯ​គ្រាប់ពូជមានសុខភាពល្អ គ្មានជំងឺ និងសត្វល្អិតបំផ្លាញ ភាគរយនៃដំណាំគ្រាប់លើសពី ៨០%។

II.ការរៀបចំដី

ល្ពៅអាចឆ្លើយតបទៅនឹងដីស្ទើរគ្រប់ប្រភេទ ប៉ុន្តែដីដែលមានជីវជាតិទាបធ្វើឲ្យល្ពៅឆាប់ងាប់ដើម។ ប្រភេទដី​ដែលអំណោយផលដល់ដំណាំ​ល្ពៅ គឺដី​​ល្បាយ​ខ្សាច់ ដីក្រហម ដីខ្មៅ ប៉ុន្តែដីដែលជ្រាបទឹកមិនល្អ មិនអាច​ឲ្យល្ពៅទទួលបានទិន្នផលខ្ពស់ឡើយ។ ម្យ៉ាងទៀតមិនត្រូវដាំល្ពៅ​ក្រោយ​ពីត្រសក់ ឪឡឹក ត្រឡាច ជាពិសេស ដំណាំអំបូរ។ ដើម្បីឲ្យការដាំដុះមានលក្ខណៈងាយស្រួល ត្រូវភ្ជួរហាលដីឲ្យបាន​ច្រើនសារ ហាលដីឲ្យ​បានយូរ​ថ្ងៃ និងរាស់​បំបែក​ដីឲ្យល្អិត ហើយយករងដែលមានទទឹង ១៨០សង់ទីម៉ែត្រ កម្ពស់រង ២៥.៣០សង់ទីម៉ែត្រ ចំងាយ​រណ្តៅ ១២០សង់ទីម៉ែត្រ បន្ទាប់មកយក​ជី​ធម្មជាតិគ្រប់ប្រភេទមកដាក់បាតរណ្តៅឲ្យបានច្រើន ហើយ​សប់ដីឲ្យចិតពីលើ ។

III.វិធីសាស្ត្រដាំដុះ

មុននឹងដាំយកគ្រាប់ពូជមកសម្អាតជាមុន បន្ទាប់មកដាក់ហាលថ្ងៃឲ្យក្តៅដើម្បីដាស់ដំណេកគ្រាប់ពូជ ហើយ​ដាក់​ត្រំាទឹកមួយយប់ ក្រោយមកយកគ្រាប់​ពូជ​ទៅលាយជាមួយនឹងថ្នាំសម្លាប់ផ្សិតបន្តិចដូចជា Mancozed, Zineb ឬ Orthocide ក្នុងកំរិត ៣ក្រាម = ១គីឡូក្រាមគ្រាប់ ជម្រៅ ២-៣សង់ទីម៉ែត្រ ក្នុង១ហិកតា គេដាំចំនួន ៤៥៦៥​រណ្តៅ ឬគុម្ពដោយប្រើគ្រាប់ពូជចំនួន ៤-៥គីឡូក្រាម។

IV.ការជ្រំជ្រោយដី

ជ្រំជ្រោយដីមានសារៈប្រយោជន៍ធ្វើឲ្យដីធូរ បន្ថយការដុះស្មៅបង្កឲ្យដីមានសំណើមគ្រប់គ្រាន់ងាយ​ស្រួលដល់​ការដុះលូតលាស់ ព្រមទាំងបំបាត់ជំរក​សត្វ​ផ្សេងៗ គេជ្រំដោយចប ដើម្បីបំផុសដី និងពូនគល់ក្រោយ​ពីដាំរយៈ​ពេល ១៥-២០ថ្ងៃ។ ពេលនោះគេអាចដករំលោះកូនចេញ ដោយទុកតែ ២-៣ដើម ក្នុង១គុម្ព។

V.ការប្រើប្រាស់

ដើម្បីឲ្យការលូតលាស់បានលឿន និងការបន្តពូជបានល្អគេត្រូវបែងចែកការដាក់ជីជា ៣លើក៖
-លើកទី១៖ យកជី ១៥.១៥.១៥ ចំនួន ១០០គីឡូក្រាម លើផ្ទៃដី ១ហិកតា មកដាក់រោយជុំវិញគល់ចំងាយ ២០-​៣០សង់ទីម៉ែត្រ មុនពេលជ្រំជ្រោយ​ដី​លប់​គល់ ​បន្ទាប់ម ជ្រំដីលប់ និងពូនគល់ឡើង។
-លើកទី២៖ យកជីអ៊ុយរ៉េ មកលាយជាមួយទឹក ហើយស្រោចឲ្យជោគជុំវិញគល់ ដោយប្រើ ១៥-២០ក្រាម លាយទឹក ១៨-២០លីត្រ។ សម្រាប់ផ្ទៃ​ដី​១ហិកតា ត្រូវប្រើក្នុងកំរិត ២៥-៣០គីឡូក្រាម។
-លើកទី៣៖ យកជី ១៥.១៥.១៥ ចំនួន ១០០គីឡូក្រាម លើផ្ទៃដី១ហិកតា មកដាក់ក្បែរគុម្ពចំងាយ ៣០សង់​ទីម៉ែត្រ ហើយកប់ដីឲ្យជិតពីលើ ដើម្បីឲ្យល្ពៅ​ផ្លែបានច្រើន ហើយផ្លែលូតលាស់បាន​ល្អរយៈពេល ៤០​ថ្ងៃ​ក្រោយ​ដាំ ។

VI.ការស្រោចស្រព

ល្ពៅជាប្រភេទដំណាំធន់ទ្រាំទៅនឹងការកង្វះទឹក ឬភាពរាំងស្ងួត ប៉ុន្តែកាលណាវគ្គចេញផ្កាសំណសំណើម​ដី​មិន​គ្រប់គ្រាន់ធ្វើឲ្យថយចុះការបន្ត​ពូជ​បាត់បង់បរិមាណផ្លែយ៉ាងច្រើន។ ការស្រោចស្រពចែកចេញជា ៣វគ្គ​​ធំៗគឺ៖
១.វគ្គលូតលាស់រហូតដល់ចេញផ្កាឈ្មោល៖ វាត្រូវការទឹកជាមធ្យមរយៈពេល ៣-៤ថ្ងៃ ផ្តល់ទឹកម្តង ប៉ុន្តែ​សំណើម​ដីមិនត្រូវឲ្យលើសពី ៦០-៦៥ភាគរយ។
២.វគ្គចេញផ្កាដល់ផ្លែ៖ វគ្គនេះត្រូវផ្តល់ទឹកឲ្យបានគ្រាប់គ្រាន់ ដើម្បីឲ្យការបន្តពូជប្រព្រឹត្តទៅបានល្អ ត្រូវរក្សា​សំណើមក្នុងកំរិតថេរពី ៧០-៧៥ភាគរយ។
៣.វគ្គផ្លែចាស់ និងទុំ៖ ការផ្តល់ទឹកត្រូវថយចុះមកវិញបន្តិចម្តងៗ ហើយផ្អាកទាំងស្រុង ពេលល្ពៅចាប់​ផ្តើម​ប្រមូលផលដំបូង។

សម្រួលអត្ថបទដោយ៖ អ៊ាង សុផល្លែត

SHARE

LEAVE A REPLY

Please enter your comment!
Please enter your name here