ឯកសារបច្ចេកទេសកសិកម្ម
រូបភាព
ការរៀបចំដី និងរណ្តៅសម្រាប់ដាំ ៖
-ត្រួវភ្ជួរឆូតដីជារងៗ ដែលមានទទឹងចន្លោះពីគ្នាកន្លះម៉ែត្រ បណ្តោយទៅតាមស្ថានភាពដី និងចន្លោះពីរងមួយទៅរងមួយ ១ម៉ែត្រ
-នៅលើរងត្រូវកាប់រណ្តៅដែលមានទំហំ២តឹកបួនជ្រុងនិងមានជម្រៅមួយតឹកន្លះ ចន្លោះពីរណ្តៅមួយទៅមួយ8តឹកទៅ១ម៉ែត្រ។
ការរៀបចំគ្រាប់ដាំ៖
-មុនដាំត្រូវយកគ្រាប់ទៅត្រាំទឹក១យប់ដើម្បីឱ្យគ្រាប់ស្រូបទឹកឆាប់ដុះពន្លកបានល្អ
-បន្ទាប់មក ត្រូវស្រង់យកទៅខ្ចប់ក្រណាត់ផ្អាប់ទុក១យប់ ដើម្បីឱ្យមានកម្តៅ និងសំណើមឆាប់ដុះតែកុំចងតឹងពេក។
របៀបដាំ៖
-ក្រោយពីបានរៀបចំរណ្តៅ និងគ្រាប់ពូជហើយ ត្រូវយកគ្រាប់ទៅដាំនៅក្នុងរណ្តៅមួយរណ្តៅពីទៅបីគ្រាប់ ការពារដុះអត់គ្រប់ ពេលដុះហើយដកចោលទុកតែមួយបានហើយ
-នៅបាតរណ្តៅ ត្រូវដាក់ជីកំប៉ុស្ត ឬលាមកសត្វពុកផុយមួយបង្គី ជ្រុំច្របល់ជាមួយដី ទើបយកគ្រាប់ទៅកប់ រួចស្រោចទឹកអោយជោគ។
ការថែទាំ ៖
-ក្រោយដាំបានរយៈពេល ២០-២៥ថ្ងៃ ល្ពៅចាប់ផ្តើមបោះទង ពេលនោះ យើងចាប់ផ្តើមដើរកាត់ត្រួយ កុំឱ្យទងលូតវែង ដើម្បីឱ្យវាបែកទងឱ្យបានច្រើនទៀត
-បន្ទាប់ពីកាត់ត្រួយរួច ត្រូវដាក់ជីបន្ថែម នៅក្បែររណ្តៅ រួចភ្ជួរលុបគល់
-នៅរដូវប្រាំង ត្រូវស្រោចទឹកឱ្យបានរាល់ថ្ងៃ ១ថ្ងៃម្តង ឬ២ដង ពិសេសនៅពេលល្ពៅចេញផ្កា
-ដើម្បីរក្សាសំណើម ត្រូវយកចំបើង ស្លឹកឈើ គ្របនៅតាមរងល្ពៅ
-ក្នុងអំឡុងពេលល្ពៅចេញផ្កា នៅម៉ោង៧ព្រឹក គួរដើរបេះផ្កាឈ្មោល យកទៅគោះដាក់ផ្កាញី ដើម្បីឱ្យវាកាន់ផ្លែ និងផ្លែបានច្រើន។
(ដកស្រង់ចេញពីសៀវភៅបទពិសោធន៍កសិករ របស់អង្គការ សេដាក ភាគ៦ បោះពុម្ពឆ្នាំ២០០៥)
