សុខភាព និងសម្រស់
រូបភាព
ការមិនលេងកីឡា និងផ្តោតតែលើអាហារខ្លាញ់ អាចបណ្តាលឱ្យរាងកាយពោរពេញទៅដោយជាតិពុល។ ប៉ុន្តែការប្រកាន់ខ្ជាប់នូវឥរិយាបថល្អមួយចំនួន អាចជួយកម្ចាត់ជាតិពុលចេញពីរាងកាយ និងជួយឱ្យមានសុខភាពល្អ អាយុយឺនយូរទៀតផង។ ខាងក្រោមនេះគឺជាទម្លាប់ល្អៗ ដែលជួយឲ្យមានអាយុវែង ៖
១.ទទួលទានអាហារឲ្យទៀងពេល៖ព្យាយាមទទួលទានអាហារថ្ងៃត្រង់ និងអាហារពេលល្ងាចនៅម៉ោងដដែលៗឲ្យទៀងទាត់ជារៀងរាល់ថ្ងៃ កុំបង្អត់អាហារ និងចៀសវាងទទួលទានបន្ទាប់ពីម៉ោង១០យប់។ ការឆាប់ទទួលទានអាហារពេលល្ងាច នឹងផ្តល់ឱ្យរាងកាយធ្វើការបានលឿន រហូតដល់ព្រឹកថ្ងៃបន្ទាប់។
២.ទទួលទានទឹកឲ្យបានច្រើន៖ការផឹកទឹកមួយកែវធំនៅពេលព្រឹកក្រោយពេលក្រោកពីដំណេក ជួយផ្តល់ជាតិទឹកឡើងវិញដល់រាងកាយ និងបណ្តេញជាតិពុលក្នុងខ្លួន។ ប៉ុន្តែមិនមែនផឹកតែមួយកែវហ្នឹងទេ ត្រូវបន្តផឹកពេញមួយថ្ងៃ រហូតដល់១លីត្រកន្លះទៅ២លីត្រ។
៣.កុំទទួលទានមុនចូលដេក៖គប្បីចៀសវាងទទួលទានមុនចូលដេក ព្រោះរាងកាយមិនត្រូវការថាមពលទេមុនពេលចូលដេក។ មិនត្រូវទទួលទានបាយ ឬអាហារសម្រន់ផ្សេងៗ ដែលជាការថែមបន្ទុកកាបូអ៊ីដ្រាតដល់រាងកាយទេមុនពេលចូលដេក ព្រោះរាងកាយនឹងស្តុកទុកថាមពលដែលលើសទាំងនោះ។
៤.កុំទទួលទានផ្លែឈើជាមួយអាហារ៖ផ្លែឈើជាអាហារពេលព្រឹក ឬអាហារសម្រន់ដ៏ល្អ ប៉ុន្តែនៅពេលទទួលទានជាមួយអាហារ ធ្វើឱ្យវាឡើងជាតិស្ករដែលធ្វើឱ្យកើនឡើងបន្ទុកកាឡូរី។ លើសពីនេះ ជាតិអាស៊ីដអាចបណ្តាលឱ្យមានបញ្ហារំលាយអាហារក្នុងពោះវៀនធំ សម្រាប់មនុស្សមួយចំនួន។
៥.ដេក៦ម៉ោងកន្លះ ដល់៨ម៉ោងក្នុងមួយយប់៖វាមានសារសំខាន់ណាស់ ដែលត្រូវដេកឱ្យបានគ្រប់គ្រាន់ ប៉ុន្តែមិនមែនដេកច្រើនពេកនោះទេ។ ការទទួលទានដំណេក ជួយរក្សារាងកាយឱ្យមានសុខភាពល្អ និងមានតុល្យភាព ជួយគ្រប់គ្រងដំណើរការដុតបំផ្លាញថាមពល និងការឃ្លានអាហារ។
៦.ជ្រើសរើសប្រេងឆាដែលត្រឹមត្រូវ៖គួរជ្រើសប្រេងដែលចម្រាញ់ចេញពីគ្រាប់ធញ្ញជាតិ ឬប្រេងអូលីវ ដែលសម្បូរដោយអាស៊ីដខ្លាញ់អូមេហ្កា-៣ ព្រោះវាមានសារធាតុប្រឆាំងអុកស៊ីដកម្ម។ ចៀសវាងប្រើប្រាស់ប្រេងឆាដែលចម្រាញ់ពីដូងប្រេង (Palm Oil) ព្រោះវាសម្បូរដោយខ្លាញ់មិនរលាយ និងប្រេងឈូករ័ត្ន (Sunflower Oil) ដែលភាគច្រើនផលិតពីអូមេហ្កា-៦៕អត្ថបទដោយ៖ អ៊ាង សុផល្លែត