គ្មាន
កន្ធុំថេតមានសារៈសំខាន់យ៉ាងខ្លាំងចំពោះផ្នែកសិកម្ម អាចប្រើជាឱសថសម្រាប់សត្វចិញ្ចឹម បង្កើនភាពធាត់ដល់សត្វលឿន អាចប្រើជាល្បាយដំណាំ ពិសេសជួយបង្កើនជីជាតិឲ្យដីត្រឡប់មកវិញ ជួយរក្សាដីឲ្យមានលំនឹងមិនបាត់បង់ជីជាតិ បើសិនវាត្រូវបានដាំនៅលើដីដែលទុកទំនេរចោល
រូបភាព
កន្ធុំថេតមានដុះនៅស្ទើរគ្រប់ទីកន្លែងដោយការដាំ ឬត្រូវបានដុះដោយប្រការណាមួយ។ វាអាចដុះលូតលាស់រហូតដល់កំពស់ ៨ម៉ែត្រ តែជួនកាលមានកំពស់ទាបជាងនេះ បើសិនវាស្ថិតនៅកន្លែងមានអាកាសធាតុក្តៅខ្លាំង។ ខ្មែរយើងនិយមដាំវាធ្វើនៅរបងរស់ ដាំលាយជាមួយដំណាំផ្សេងៗ ឯការប្រើការវិញនោះគឺភាគច្រើននិយមនាំគ្នាបេះយកត្រួយខ្ចីៗមកធ្វើជាល្បោយនំបញ្ចុក និងជួនកាលយកធ្វើជាអន្លក់ក៏មាន។
ដើមកន្ធំថេតជាប្រភេទរុក្ខជាតិមួយដែលដុះនៅក្នុងតំបន់ត្រូពិក ហើយរស់នៅបានយូរឆ្នាំវាមានដើមកំណើតមកពីប្រទេសមិកស៊ិកកូ។ វាជារុក្ខជាតិចំណីសត្វដែលមានជីវជាតិខ្ពស់បំផុតនៅតំបន់ត្រូពិក និងអនុតំបន់ត្រូពិក ដោយស្លឹករបស់វាមានសារធាតុប្រូតេអ៊ីនកំរិតពី ២០ ទៅ ២៥%P ស្មើទៅ Lucerne/alfalfa (Medicago Sativa) និង White Clover (Trifolium Repens)។ កន្ធំថេតមានឱជារសណាស់ហើយអាចបង្កើនភាពធាត់ដល់សត្វលឿន។
ក្រៅពីនេះ កន្ធំថេត ជារុក្ខជាតិមួយប្រភេទដែលមានការលូតលាស់យ៉ាងឆាប់រហ័សដើម និងមែករបស់វាអាចយកមកធ្វើជាអុសដុតសម្រាប់ចំអិនអាហារ សំបករបស់វាគេយកធ្វើជាលក្ខពណ៌លឿង ឯផ្លែខ្ចីៗរបស់វាកូនក្មេងចូល ចិត្តបេះយកមកប្រឡេះគ្រាប់បរិភោគលេង។
ចំណែកស្លឹករបស់វាវិញ គឺជាចំណីសត្វយ៉ាងល្អបំផុត ពីព្រោះវាសម្បូរណ៌ដោយប្រូតេអ៊ីនយ៉ាងច្រើន។ គេអាចប្រើគ្រាប់វាសម្រាប់ទំលាក់ព្រូនមាន់ទាយ៉ាងមានប្រសិទ្ធភាព។
**ការទំលាក់ព្រូនមាន់ដោយប្រើគ្រាប់កន្ធំថេត
តាមធម្មតា សត្វមាន់ដែលមានព្រូននៅក្នុងខ្លួនបង្កឲ្យមានរោគសញ្ញាដូចខាងក្រោម :
-មាន់មានសាច់ស្លេកហាក់ដូចគ្មានឈាម
-រោមមាន់រាងស្រអាប់
-មាន់មិនសូវរហ័សរហួនស្វែងរកចំណី
– មាន់ស្គមចេញទ្រនុងខ្នង និងមិនឡើងទំងន់
-នៅក្នុងលាមក គេសង្កេតឃើញមានព្រូន ។
*ចំណែកឯវិធីព្យាបាលបង្ហាញជូនដូចខាងក្រោម :
-ចំពោះមេមាន់ឲ្យផឹក ១ ដង ៣ គ្រាប់ ក្នុងមួយថ្ងៃ និងផឹករយៈពេលមួយអាទិត្យ
-ចំពោះកូនមាន់ផឹក ១ ដង ១ គ្រាប់ ក្នុងមួយថ្ងៃ និងផឹករយៈពេលមួយអាទិត្យ ។
ក្រោយពេលផឹកអស់រយៈពេលមួយអាទិត្យមក គាត់សង្កេតឃើញមាន់មានភាពស្រស់ថ្លា និងរហ័សរហួនដើររកស៊ីចំណីឡើងវិញ ។ ហើយនៅក្នុងលាមកក៏លែងមានព្រូនទៀត ។ តាមបទពិសោធន៍ខាងលើនេះ គ្រាប់កន្ធំថេតជាឱសថព្យាបាលការទំលាក់ព្រូនមួយយ៉ាងមានប្រសិទ្ធិភាព ។ ហើយគេមិនត្រឹមតែអាចព្យាបាលមាន់ទេ គេអាចព្យាបាលការទំលាក់ព្រូនលើមនុស្សទៀតផង។
ការប្រើប្រាស់ៈ
-ស្លឹក៖ បេះ និងបូតដាក់សំដិលក្នុងម្លប់ចំនួន ២ថ្ងៃ អាចយកមកលាយឲ្យសត្វគ្រប់ប្រភេទស៊ីបាន ដោយលាយក្នុងអាត្រា ២០ ទៅ ៣០ ភាគរយនៃចំនួនចំណីសរុប។ យើងមិនគួរយកស្លឹកកន្ធុំថេតមកអោយសត្វស៊ីពេលនៅស្រស់ៗបានឡើយ គឺចាំបាច់ត្រូវហាលក្នុងម្លប់ជាមុនសិន បើមិនដូច្នេះទេ ត្រូវយកវាមកត្រាំលាយជាមួយទឹកស្ករកាកអំពៅ ទុកចោលមួយយប់សិនមុននឹងឲ្យសត្វវាស៊ី យើងអាចផ្តល់ស្លឹកនេះឲ្យមាន់ ទា ជ្រូក ពពែ ត្រី ទន្សាយស៊ី អាចជំនួសពោត ឬសណ្តែកបាមួយរយភាគដែរ។
ចំណែក ស្លឹកតូចៗរបស់វាដែលជ្រុះក្រោមដើម យើងអាចបោសប្រមូលកើបយកមកដាក់ក្នុងរណ្តៅដាំដំណាំ ឬយកមកលាយជាមួយដីសម្រាប់ដាក់បណ្តុះគ្រាប់ដំណាំផ្សេង ឬអាចយកមកដាក់គ្របលើគល់ដំណាំក៏បាន ។
នៅប្រទេសឥណ្ឌាគេបានផលិតម៉ាស៊ីនម្យ៉ាង អាចដំណើរការដោយដុតអុសយកចំហេះមកផ្តល់ឲ្យម៉ាស៊ីនជាជំនួសប្រេង ដោយប្រើប្រាស់ដើម និងមែកកន្ធុំថេតសម្រាប់វត្ថុធាតុដើម ។
ដីនៅក្នុងចំការ ដែលពុំសូវល្អគួរដាំដើមកន្ធុំថេតនេះចោលដើម្បីឲ្យវាជួយបង្កើន ជីជាតិឲ្យដីត្រឡប់មកវិញ ប្រសើរជាងដាំដំណាំផ្សេងៗដែលគ្មានប្រយោជន៍ ។
វិធីមួយនៃការប្រើប្រាស់កន្ធុំថេត គឺត្រូវដាំវាជាជួរៗ តែត្រូវកាត់តម្រឹមវានៅពេលវាមានកំពស់បាន ១ម៉ែត្រកន្លះ ដោយចងខ្សែពីចុងជួរម្ខាងមកចុងជួរម្ខាងទៀត ដើម្បីងាយស្រួលកាត់តម្រឹមវា។ នៅពេលដែលមានត្រួយថ្មីលាស់មកយើងអាចកាត់ត្រួយនោះយកមកធ្វើជា ដំណាំសត្វបាន យើងអាចប្រមូលត្រួយនេះបាន២ ទៅ ៣ដងក្នុង ១សបា្តហ៍ បើសិនជាយើងមានដាំច្រើន។
សម្រាប់នៅទីកន្លែងដែលគ្មានអុសដុតយើងអាចដាំកន្ធុំថេត អង្គារដី អង្កាញ់ឲ្យបានច្រើនពីព្រោះវាសឹងជាដំណាំដែលដុះលូតលាស់លឿនអាចឲ្យយើងយកមកប្រើការធ្វើអុសដុតបាន។ នៅប្រទេសខ្លះគេបានដាំកន្ធុំថេតនៅក្នុងចំការធំៗ ដើម្បីយកស្លឹកវាធ្វើចំណីសត្វ និងយកដើមវាធ្វើថាមពលផ្គត់ផ្គង់ឲ្យម៉ាស៊ីនភ្លើង ។
ចំពោះតំបន់ណាដែលគ្មានអុសព្រៃ គេបានដាំកន្ធុំថេតនៅលើដីទំនេរគ្រប់ទីកន្លែង ក្រោយមកវាបានក្លាយជាព្រៃអុស ជំនួសឲ្យការលំបាកគ្មានអុសដុត កាត់បន្ថយបានពេលវេលាដើររកអុស កាត់បន្ថយបានការបំផ្លាញព្រៃ និងជួយធ្វើឲ្យដីរក្សាបាននូវលំនឹងរបស់វាមិនបាត់បង់ជីជាតិ៕
សម្រួលអត្ថបទ៖ អ៊ាង សុផល្លែត
សូមរក្សាទម្រង់អត្ថបទរបស់ខ្ញុំរាល់ប្រភពដែលយកទៅចែកចាយបន្ត។